1 Tawarikh 19
Mangkato matemi tu Nahas, datu to Amon, anna anakna muane ussondai dadi datu.
Ma’kadami Daud nakua: La umpa’petiroanna’ kamasokanangku lako Hanun, anakna Nahas, belanna iatu ambe’na mangkamo umpa’petiroan kamasokananna lako kaleku. Iamoto nasuai Daud tu sumbungan puduk umpakatanai diona kamateanna ambe’na. Apa iatonna rampomo tu taunna Daud lako Hanun lan tondok to Amon, la umpakatanai tu datu,
ma’kadami tu mintu’ arungna to Amon lako Hanun, nakua: Misangaraka tonganna tu Daud umpakala’bi’ ambe’mi dio olomi, belanna ussua ba’tu pira-pira to ma’pakatana mennolo lako kalemi? Manassa iatu tau iatu mati’ sae la umparessai a’ganna te tondok sia la ussanggangi; iamo bannangnato nasae tu taunna lako kalemi la usserre’i te tondok iate.
Natingkanmi Hanun tu taunna Daud, namesua ungku’ku’i sia usse’pa’i sangpiak tu sambu’na sae rokko to’ garonto’ pupunna, namane ussuai sule.
Iatonna ma’tangnga lalanmo sule, denmi tau male umpokadanni Daud diona tau iato mai, anna suai datu tu ba’tu pira-pira pesua male umpessitammui, belanna masiri’ tongan; nasuami datu ungkuanni tu tau iato nakua: Melo ke torrokomi dio Yerikho sae lako tuona sule tu danggo’mi, mimane sule.
Iatonna issanmi to Amon kumua umpakadake lelemo kalena dio olona Daud, napakatumi Hanun sola to Amon tu sangsa’bu talenta salaka la ussaroi ba’tu pira-pira kareta parari sia pakkanarang dio mai Mesopotamia, Aram-Maakha sia Zoba.
Nasaroi tu tallungpulo ndua sa’bu kareta parari sia datu Maakha sola surodadunna. Rampomi anna ma’tenda dio tingona Medeba. Ia duka tu to Amon sangtassurammo lan mai kotana, anna sirampun la male parari.
Iatonna rangimi Daud tu kareba iato, nasuami tu Yoab sola mintu’ surodadu, iamotu surodadu pa’tonno’.
Tassu’mi tu to Amon anna ma’pampangan dio to’babangan kota, na iatu mintu’ datu saemo untundui pada ma’tenda dio inanna dio lu padang.
Iatonna tiromi Yoab tu surodadu umpempatui la ullaoi lu dio mai tingayo sia dio mai boko’, napileimi tu ba’tu pira-pira surodadu dio mai pa’tonno’ to Israel, napopa’pampanganni sitingoan to Aram.
Iatu mintu’ surodadu tu torronapa nasorong lako Abisai, adinna, anna ma’pampangan sitingoan to Amon.
Nakuami Yoab: Iake nasau’na’ tu to Aram, la mutunduina’, na iake nasau’ko tu to Amon, manassa la saena’ untunduiko.
La batta’ko sia la lalongki’ belanna bangsata sia belanna mintu’ kotana Kapenombanta. Na PUANGmora umpogau’i tu apa naala penaanNa.
Tassu’mi lako tingayo tu Yoab sia mintu’ tu surodadu nasolan la sirari to Aram, anna male mallai tu to Aram dio mai tingayona.
Iatonna tiromi to Amon, kumua mallaimo tu to Aram, mallai dukami tu tau iato mai dio mai tingayona Abisai, adinna Yoab anna sorong boko’ sule tama kota. Rampomi sule tu Yoab tama Yerusalem.
Iatonna tiromi to Aram kumua natalomo to Israel, nasuami tu ba’tu pira-pira pesua, la urrampun to Aram, tu sambali’na lu salu, la lao parari, na Sofakh, kamandang lompona Hadadezer umpangului tu tau iato mai.
Iatonna dipokadammo Daud tu iannate, narampunmi tu mintu’ to Israel, nalamban lian Yordan, anna male urrarii sia ma’pampangan sitingoan tau iato mai. Iatonna popa’pampangammi Daud tu surodadunna sitingoan to Aram, sirarimi tau iato mai.
Apa mallai tu mintu’ to Aram dio mai tingayona to Israel; napateimi Daud pituratu’ tu darang karetana to Aram sia patangpulo sa’bunna surodadu ma’lingka. Sia iatu Sofakh, kamandang lompo, napatei duka.
Iatonna tiromi mintu’ arung umpengkaolai Hadadezer, tu diona kanataloanna to Israel, sitamami Daud tu tau iato mai sia mengkanorong lako; na iatu to Aram manokamo untundui to Amon.